Rey PJ Abellana, binawi ang naunang pahayag tungkol sa pagkakaroon ng one night stand ni Tom Rodriguez

Binawi ng batikang aktor na si Rey “PJ” Abellana, ama ni Carla Abellana, ang naunang pahayag nito na mayroong naka-one night stand ang kanyang manugang na si Tom Rodriguez.

Sa kanyang panayam sa GMA News kamakailan lamang, ibinahagi ni Rey PJ na kinausap siya ni Tom tungkol sa bagay na ito at sinabi ni Tom na walang katotohanan ang mga paratang at akusasyon sa kanya.

Ayon daw sa aktor, walang one night stand na nangyari.

Kwento ni Rey PJ, “At first, nalaman ni Carla na may issue na one-night stand na involved si Tom. Si Tom naman already able to explain kay Carla na wala naman din pong katotohanan ito at naiwasan naman din niya na mangyari iyon.

“Wala pong natuloy na one-night stand according to Tom’s side,” paglilinaw pa niya.

Sa kanilang pag-uusap daw ni Tom ay paulit-ulit nitong sinabi sa kanya kung gaano nito kagusto na magka-ayos sila ng kanyang asawang si Carla.

Umiyak pa raw si Tom sa kanyang harapan at ipinaliwanag kung gaano niya kamahal si Carla kaya niya ito pinakasalan.

Lahad pa ng beteranong aktor, “When he came over to talk to me and explain his side, he would cry along with his explanations and everything and he keeps on saying na, he wants his wife back.

“He wants Carla back. He loves Carla very much that’s why they settled down.”

Sa nasabing panayam, inamin din ni Rey PJ na nagalit sa kanya ang anak na si Carla dahil sa mga pahayag niya tungkol sa ‘di umano’y hiwalayan ng dalawa.

Matatandaang sa panayam kay Cristy Fermin, ipinunto ni Rey ang ilang bagay tungkol sa “breakup” ng mag-asawa. Una, ang one-night stand issue, na binawi lang rin ni Rey kalaunan; pangalawa, kung paano siya naniniwala na si Tom ay hindi bakla; at pangatlo kung paano niya naiintindihan ang ‘di umano’y pagtataksil ni Tom.

Kinausap daw siya ng kanyang anak na si Carla tungkol sa mga naging pahayag niya. Nang magpaliwanag siya dito ay hindi na raw nag-reply pa ang aktres sa kanyang mga mensahe.

“She was mad. She was questioning me, why it came up that way. Of course, I explained it to her right away and after explaining my side, hindi na din naman siya nag-message ulit,” anito.

Matatandaang January ngayong taon, ilang buwan ang nakalipas matapos ikasal sina Carla at Tom ay umugong ang balita na hiwalay na ang dalawa.

Hanggang ngayon ay wala pa ring inilalabas na pahayag ang dalawa tungkol sa mga kontrobersiyal na isyu tungkol sa kanila.

Anong reaksyon mo sa balitang ito? Share your thoughts!

The post Rey PJ Abellana, binawi ang naunang pahayag tungkol sa pagkakaroon ng one night stand ni Tom Rodriguez appeared first on The Filipino Today.